Кукурузның файдалы үзенчәлекләре

Йомшак чәч белән капланган алтынсу чәкәннәрне Үзәк һәм Көньяк Америка индеецлары Ходай бүләге дип атаган. Европалылардан кукурузны беренчеләрдән булып Христофор Колумб күрә. Шуннан соң, аны Европада да үстерә башлыйлар.

Соңгы тикшеренүләр күрсәткәнчә, кукурузда организм өчен мөһим булган бөтен төр витаминнар да, микроэлементлар да бар. Аның составында В, РР, К һәм Е витаминнары, тимер, цинк, калий, аз күләмдә натрий бар. Кукуруз составындагы фосфор баш мие эшчәнлеген, теш һәм сөякләрне ныгыта, нерв системасы эшчәнлеген көйли. Ә иң мөһиме — кукуруз составында тиз үзләштерелүче һәм нервларны тынычландыручы алтын бар.

Кукуруз клетчаткага да бай. Клетчатка эчәклекне чистартып кына калмыйча, организмдагы яман шеш китереп чыгаручы калдыкларны тышка чыгара.

Кукурузга алтынсу төс бирүче каротиноид шулай ук яман шешкә каршы көрәшә. Кукуруз кисәкләре кандагы холестеринны киметә. Кукуруз ризыклары атеросклерозны кисәтә.

Дөрес тукланган карт кешенең күзе яхшы күрә, дип белдерә диетологлар. Сары пигментлы яшелчә һәм җиләк-җимешләр күз күремен сакларга ярдәм итә. Сары кукуруз чәкәннәре, кишер, кабак һәм әфлисун кебек үк, күз өчен бик файдалы. Тик дәвалану өчен яшь, сөтле чәкәннәрне сайларга кирәк. Артык картаеп киткән кукурузны организм бик авыр эшкәртә.

Углеводларның төрлесе бар. Гадиләре — шикәр комы, кәнфит, туңдырма, кайнатма, шоколад һәм камыр ризыклары составындагы углеродлар. Алар бик тиз арада глюкозага кадәр таркалып, организм өчен куркыныч тудырырга да мөмкин. Чөнки башта глюкоза кирәгеннән артык була, организм аны эшкәртү өчен бик күп инсулин сарыф итә. Аннан глюкоза кинәт кенә кими. Шулай итеп, ми күзәнәкләре “ач” кала.

Ә кукуруз, боткалар, ипи, яшелчә, кузаклылар составындагы катлаулы углеродлар нигездә крахмалдан тора. Алар ашказанына эләккәч, әкрен таркала һәм баш мие күзәнәкләре тиешенчә туенып өлгерә.

Кукуруз маенда гомерне озайтучы Е витамины күп. Кремнарга юкка гына кукуруз мае кушмыйлар. Ул тиренең сыгылмалылыгын, саклану үзлеген арттыра.

Чәкәнне чорнап алган чәчләрне халык медицинасында сидек һәм үт куучы, кан агуны туктатучы буларак кулланалар. Чәчләрне кукуруз өлгереп җиткәнче җыеп, ачык һавада киптерәләр.

Әлеге темага башка язмалар